下载客户端

阿拉屋里个壮小囡（上）

2020-07-31 14:58

来源：澎湃新闻·澎湃号·湃客

原创周伟新海上梦叠

作者：周伟新

上海话改写：边秦翌

讲述：李国琪

指导：丁迪蒙

音频制作：沉默是金

2011年是兔年，有一桩阿拉蒋、周两家人家勒一道盼望个大事体：要有第三代唻。事先也已经打听、了解过了，是个姑娘。哎呀，向来有眼重男轻女个家主婆勿断叹气、惋惜：要是个男小囡就好了，男小人长大之后，出去闯世界勿要忒好噢。我倒是特别个开心：自家只有儿子，看到过男小囡长大，呒没看到过小姑娘个成长。

3月中旬个一天，两家人家聚勒国妇婴套房个外间，静静叫等勒海，等宝宝降临。下半日一点钟快，听到里间有得走路个声音，阿拉快点奔进去。看到新妇朝牢阿拉点点头，面色有眼红，面孔浪向侪是甜蜜蜜、又有眼神秘兮兮个笑意。过脱一歇，一位中年护士抱仔毛毛头进门了，开口就讲：“是弟弟噢……”

啥？！呒没听错脱伐？！大家侪呆脱唻！像煞是刚刚还勒看太阳落山个，一转眼就变成海边个日出了？回过神来，大家侪翁勒一道，细细叫个欣赏毛毛头，看到宝宝清清爽爽个面孔，眼睛闭勒海，眉心好像也有眼皱勒海，邪气安静个，一付勒体验迭个新世界个样子。

哈哈，先勿管唻，顶顶要紧个，搿是个男小囡。

外公是开心得要跳起来了，面孔通红：“男小囡啊！我欢喜个呀！”外婆第一个拍手了，阿拉侪跟牢仔伊一道用力个拍手。

突然之间，毛毛头“哇”哭出来了，像煞是勒对闹哄哄个声音提抗议，所有人快点拿嘴巴闭牢，大家像众星拱月一样拿伊围勒当中，静静叫个盯牢仔伊看。外婆邪气轻、邪气温柔个讲：“噢噢，宝宝对勿起噢，阿拉吵到侬了噢。”毛毛头呢，好像搭外婆心灵相通个，听到了外婆个声音之后呢，立时三刻就勿哭了。

搿个辰光，护士再拿刚刚拨打断脱个闲话接下去:“小宝宝7斤2两，邪气健康个噢！”

新妇笑咪咪讲：“巧伐，巧伐？阿拉三家头生个辰光侪是7斤2两呶。”

几天之后，我搭仔我阿姐一道去望望伊拉。毛毛头勒姆妈身边睏着了。我讲，阿拉讲闲话要轻眼，勿要吓着伊。新妇讲：覅紧个，覅紧个，宝宝睏觉邪气好，勿会惊醒个。搿个辰光，护士点了两记门，走到房间里向，手里拿好仔奶瓶，轻手轻脚个朝宝宝走过去。又轻轻叫抱起毛毛头，拿奶嘴勒伊嘴巴浪轻轻叫滑两记，宝宝呢，眼睛没张开，但晓得张开嘴巴咬牢仔奶瓶，然后就听到一连串个“咕嘟咕嘟”，一口气就拿一瓶奶夯下去了。护士抱牢仔伊，拿伊个头搁勒肩胛浪向轻轻叫个拍拍背，听到“咯”一声，一只隑打出来，通气了。然后就拿毛毛头轻轻叫摆勒床浪，宝宝呢，照样睏伊个觉。

“真像只小动物，生命力哪能介强个啦！”我称赞了一句，眼睛里向有眼湿嗒嗒。

宝宝大名周璟琦，小名叫琦琦。回到屋里勿久，日里向，外公、爸爸姆妈侪要上班个，外婆对保姆做个生活勿大放心，又考虑到阿拉两夫妻年纪侪大了，身体也勿好，所以侪是外婆领勒海个，搿真个是桩邪气繁重个工作呀。

琦琦六个号头辰光，长得像只圆滚滚个小立柱。家主婆一直讲，外婆带小人手势实在是忒好唻。我儿子拿伊抱勒海，我就去惹伊白相，四只眼睛对牢仔看一歇，就朝牢小家伙拍拍手，拿手臂膊张开来：“琦琦，过来，抱抱。”儿子摇摇伊讲：“让阿爷抱抱好伐？”只看到伊一眼也勿犹豫，一把头抓牢我肩胛搿搭个衣裳，扭了扭腰，小屁股一抬，就朝牢仔我扑过来了噢。

我快点拿伊接过来抱牢仔。讲句老实闲话，我觉着搿辰光有眼激动，血液好像冲得特别快，浑身上下侪是热乎乎个。“哎呦，真个是邪气结棍唻，动作介干脆，一眼勿拖泥带水！”我讲。儿子讲：“是个呀，伊出手老快个，平常一定要看牢伊，否则要惹事体个。”