下载客户端

知道“淮国旧”，你厉害；知道“南国旧”，你才算牛

2020-05-25 07:07

来源：澎湃新闻·澎湃号·湃客

原创西坡海上梦叠

作者：西坡

改写、朗读：何秀萍

沪语指导：丁迪蒙

近几日，周云芳女士个《淮国旧与我个百花搪瓷锅》一文勒新民夜报浪登出来，引起邪气多个共鸣。我感到有眼意外：“淮国旧”个话题，已经是老生常谈了。记得马尚龙先生就写过邪气长个一篇回忆文章，像煞有眼拿伊“赶尽杀绝”个味道。读者竟然还勒乐此勿疲，证明“怀旧”个力量仍旧邪气结棍个。

事实浪向，上个世纪中期，上海还有过一家搭“淮国旧”以及南京东路（近福建路）个“协群调剂商店”三足鼎立个旧货商店——“南国旧”，伊个标准称呼，我已经记勿得了，套用周女士个说法，好像应该是称作“国营南京西路旧货商店”伐。

1937年开始由上海福利营业股份有限公司绘制、出版的地图显示:原“南国旧”所在地曾经是“商务书馆”

可能是我孤陋寡闻，“南国旧”至今勿大有人提起，此冷彼热，实在是令人遗憾个。要晓得，当年个“南国旧”，其实是上海滩最大个旧货商店！

搭“淮国旧”一样，“南国旧”现在也勿存在了。“淮国旧”所在个房子拆迁了，而“南国旧”所在个房子呢，则是拨做了勿伦勿类个翻建，面目全非了。

伊，勒啥地方呢？就勒上海电视台（南京西路大门）个斜对面（现在个698广场）。

“南国旧”后变身为“上海友谊商店古玩分店”

说来话长，“南国旧”所在个区域——东到成都北路，西到石门路，南到吴江路，北到凤阳路，从前侪是属于李鸿章家族、盛宣怀家族、邵友濂家族个产权。

李鸿章、盛宣怀，勿必多啰嗦了；邵友濂，就是坊间哄传个“上海道台”（俗称“上海市长”），其实迭个勿准确，应该称伊为“苏松太道道台”。

“南国旧”一带，老早辰光叫做斜桥。石门路原先是一条河浜，叫东芦浦，斜桥因河而建，地块因桥而名。

斜桥个名称有眼土气，但当年周边聚集勒海近代中国最有影响个三大家族，有“斜桥盛府”“斜桥李府”“斜桥邵府”之称。乃么怪了，三大家族哪能会得勿约而同个“逐‘斜’而居”呢？原来，伊拉之间是有姻亲关系个——邵友濂个大儿子娶讨了李鸿章个侄女，小儿子讨了盛宣怀个囡儿。邵友濂有个孙子是邪气有名个，叫邵洵美，邵洵美个外公叫盛宣怀，邵洵美讨个就是盛家大小姐盛佩玉。

另外，1879年美籍苏格兰人福布斯等建造个“乡下总会”（1945年改为美国斜桥总会），就建勒现在上海电视台一带个地面浪；房地产大亨周湘云个豪宅（后来做了岳阳医院门诊部），也勒“南国旧”个对面。

1879年美籍苏格兰人福布斯(Mr.Forbes)等在静安寺路斜桥弄(今吴江路)创办的英国乡村总会，又名Country Club。1945年改为美国斜桥总会。1949年之后为上海体工队使用。1973年拆除后建上海电视台。

斜桥土伐？一点也勿土。

由于家道中落了勿少，邵家拿老多地皮抵押拨了别人，但还是勒此地造了几套房子，邵洵美为搿撘取名“同和里”。葛末，“南国旧”是勒“同和里”个地皮浪造个，还是勒“同和里”边浪向造个呢？我勿确定，至少好几年前头，标榜为“同和里”个伊条弄堂还勒海个。

“南国旧”个房子，高堂广厦，气势非凡，有几十米宽、三层楼高，每层楼即使分隔成两层，也是绰绰有余个。伊个结构坚实牢固。从外表搭内部看，伊勿像是民居，倒更加接近于行政办公场所。

葛末，搿幢大楼房子是啥人造个呢？原来个产权属于啥人呢？啥人住勒里向呢？可惜，我呒没办法晓得。

邵洵美与盛佩玉

邵洵美只讲过伊自家住勒“同和里”，葛末伊为啥从来呒没提到过“南国旧”大楼？我推测，勒邵洵美搬离“同和里”个辰光，可能伊还没造起来，或者搭邵家呒没啥关系伐。

老多年前头，我搭邵家个后人、著名集邮家邵林先生一道到已改为“上海集邮公司”个原“南国旧”开会，我搭伊讲：“我从小就到搿幢房子里向白相了。”伊停了一歇，讲：“哦，搿幢房子，是我屋里个。”

“我屋里个”，葛就是邵家个啰。

查上海福利营业股份有限公司从1937年开始绘制个地图浪，可以晓得，“南国旧”原来个地址浪标勒“商务书馆”个字样。伊撘商务印书馆是啥个关系呢？我查到个资料显示，商务印书馆勒1932年“一二八”战火中拨炸脱，曾经租借了搿幢大楼用作制版印刷厂。

我又寻到了一张旧照片，经过比对，基本可以肯定照片里个房子就是“南国旧”曾经入驻个物业，不过，伊个辰光搿搭是一家车行（威利汽车行陈列汽车样品）。伊搭西面由西班牙设计师莱丰（YrronLafuete）设计个一幢三层砖木石混合结构个房子，原飞星汽车公司，形成了“4S店”个集聚效应。

照片疑似为原“南国旧”建筑，显示为曾经是车行

因此，伊个原主人究竟是啥人，还勿能确定。

“南国旧”比“淮国旧”大，大就大勒有二楼。伊个底楼，左面柜台卖收音机、面盆等杂货，当中柜台卖钟表珠宝照相机（我曾经去修过一只“三五牌”台钟，因此记忆犹新），右面勿设柜台，卖个是旧衣裳、被面子咾啥；后面卖眼小件家生。二楼空空荡荡，是卖裘皮大衣搭毛料衣裳个所在。我有个同学住勒“同和里”，伊个父亲勒“南国旧”上班，阿拉因此能够勒二楼尽情个白相“官兵捉强盗”，穿梭于皮毛之间，有辰光难免拨吓到——辣末生头有根狐狸尾巴或者一只水貂头撞到额骨头浪。

有人讲，“南国旧”里有卖大型红木家生个，我勿认可搿个。卖红木家生比较多个是“淮国旧”，记得是勒搿家店最到篤底个区域，出门就是长乐路了。

“南国旧”变身为集邮公司个当中，还做过上海友谊商店古玩分部。伊个辰光，“南国旧”前头老大个空地浪经常停满了乘外国游客个“日野”大巴，伊个情形搭往东几百米个上海杂技场有得一拼。