立夏吃蛋、称人，侬晓得哇？

原创 侯宝良 上海老底子

侬晓得哇？

吃蛋、称人，

立

夏

文侯宝良

又听“夜五子”（即：知了）叫，转眼“立夏”到了，大家阿晓得立夏搿天要吃蛋，吃仔中饭后还有去“称人”个习俗，就是人去称体重。要问有啥典故，恐怕一时还讲不上吧，想想阿拉小辰光个情景，还蛮有趣个。

我小辰光，住拉辣老城厢里，一到立夏迭天，邻居隔壁个小朋友侪会拿出红红绿绿个纱线来做蛋套。做好仔就拿个烧熟大鸭蛋套进去，一般就是咸蛋，挂拉辣胸前晃荡、晃荡覅讲有几或开心咯。

迭蛋套侬会做伐？我现在教侬，老便当个：拿根粗2毫米个线套拉自家辣头颈里，两头挂到胸口前合适个地方并起来打个结，再扯几根粗丝线，多少就看欢喜网眼大小来定。对折起来有三个半蛋长个即可，统统挂拉辣头颈里个粗线浪，开始脱相邻个线互相打结成环形，接头个高低可用合适网眼大小个物事作标准工具，像小个木尺啥个。一圈圈结下去，当结到可放得落一只蛋个尺寸辰光，就拿所有个线头集拢起打个大结，留下个一把线头梳理、剪齐刚好成了漂亮个彩须。到辰光小朋友道里聚拉辣一道，就欢喜比啥人个蛋大。

称人，从前要看啥人个分量重就“吃价”（音ga，吃香），而现在人倒要看是否超过标准？要么看减肥效果哪能了？听老人讲，从前乡下头称人是双手吊拉辣大个称勾浪，双脚离地来称分量，小人就坐拉辣箩筐里像称小猪猡一样好笑死了。到阿拉小辰光只要侬到有大磅称个米店、煤球店或者小菜场里侪好去称。以前我老屋里就住拉辣煤球店个楼浪，每年立夏迭日脚，常桩看到邻居们纷纷来称体重，我奶奶正好是营业员么，迭天除了做生意之外就是称人，虽然蛮忙个，但气氛相当热闹。

住拉辣对面翁家弄里有个松江人面红堂堂，身体“壮唻”（很胖）蛮巧姓叫庄，侪叫伊“庄家伯伯”。也来称体重，足足有200多斤重啊，来让人看了“眼痒”（羡慕），现在讲得难听就是“臃肿”。勿过当时侪讲伊有“福相”。伊倒讲：“倷看我福嗒嗒，我走路吃力啊。”哎！就拉辣迭年初冬个一天早浪头，伊被救护车送去医院。

听邻居讲，懒大块头中风了。当时大家还弄勿懂，好好较一个人，哪能会瘫痪呢？现在想想，以前大家缺乏保健知识，只晓得补营养，觉着胖眼总比瘦好，勿晓得太胖了就会潜伏毛病。

现在我晓得立夏吃蛋、称人搿些习俗还是从古代三国辰光传下来个，老百姓为了图个“盼头”。吃蛋现在是勿稀奇，有营养最好天天吃。称人就怕胖、出丑，啊是颠倒过来了？勿过当作民族文化习俗相传下来意义倒勿小。

鸣谢：侯宝良先生赐稿分享！

原标题：《【老里八早】立夏吃蛋、称人，侬晓得哇？（作者：侯宝良）》

阅读原文