下载客户端

沪语：有来有往，日脚兴旺

2025-03-13 22:40

来源：澎湃新闻·澎湃号·湃客

来源：新民晚报

作者：吴翼民

沪语改写、讲述：朱枫

审核、指导：丁迪蒙

编辑：王乙其

过年前头，微信群里侪勒聊过年個菜肴，我偶然透露自家准备做一眼传统个糟鸡糟肉，一位资深个美食家微友表示有兴趣。我索介就趁一趟碰头个机会，带仔一小盒糟焖肉拨伊。

我个诀窍是拿糟搭焖同时运用，香糯入骨，确实好吃又有特色，搿位资深美食家品尝过后连连叫好。然后，伊专程开车过来送拨我一条新鲜个野生翘嘴。我一記頭感受到了从前邻里之间有来有往个情义，心里想，人搭人勿管交往个形式哪能，情感个纽带勿会松弛乃至断裂。

小辰光，每年夏天，枇杷搭杨梅先后上市，嫁勒西山个孃孃总归准时送得来迭个迷人个夏果。埃歇横里，巷子里黄包车铃声叮当，嬢孃小即零仃个身体几乎拨果篓掩没脱。搿歇辰光，祖母顶有面子了，除脱仔自家屋里水果尽吃，伊还会颠发颠发挨门挨户去送拨邻居，一面笑眯眯個讲：“搿是我西山囡儿自家果园里采个，邪氣新鲜，拨大家尝尝。”邻居拉尝过之后也侪称赞：“真好，侬囡儿从西山送来个水果，甜是甜得唻。”冬天，嬢孃用自家采來个野山蕈熬了蕈油送得来，搿也是稀奇货，祖母会拣蕈油面请邻居拉品尝，总归又得到大家个称赞。

大阿哥勒中学读书辰光品学兼优，年年获奖，奖品是百来斤大米，我常庄跟牢仔娘雇黄包车到中学去领回奖品。车子拉米，我搭娘随车而行，一路浪可以感受到眼热个目光。回到屋里，母亲烧一大镬子饭，用海碗盛好仔，逐門逐户去送拨邻舍，送去个辰光还有閑话：“搿是我二囡（我大阿哥）学堂奖得來个米，撥大家沾点喜气。”伊歇辰光连得平常个米饭也好端拨邻居，自然融洽，当然咾，碗里盛个也勿单单是米饭。乃末邻居回馈赞语一片：“来三个，㑚兒子真有出息。”用勿着讲，呒没过多少辰光，伊拉也儕會回送各种吃个物事。

埃个辰光，来来往往送得最多个是馄饨。伲屋里难板裹趟馄饨，母亲板定会端拨几家邻居尝尝，而搿种差事一般侪是我做個。自家肚皮饿到贴背心了，还要端拨邻居去，一路浪向咕噜咕噜怨天怨地。端拨邻居，自家吃个就少了，但是母亲讲，端来端去就端出了人情，人情是顶宝贵个。我明白，我端去了人情，过后邻居也会端来人情，于是，就盼望邻居屋里也裹馄饨。听到邻居屋里有砧墩板劗肉个声音，就邪氣開心，可惜，埃个年月搿种声音实在是少，物资供应实在是紧缺呀。有意思个是，物资越是紧俏，邻舍道里个人情却越是丰厚，啥人家屋里有好吃个、总归会得想着左邻右舍。