下载客户端

沪语：勿要拿爱情弄落脱了

2025-03-14 15:46

来源：澎湃新闻·澎湃号·湃客

来源：新民晚报

作者：周珂银

沪语改写：丁一军

播讲：王维杰

审核、指导：丁迪蒙

编辑：王乙其

元旦，2018年头一天，啥人侪希望有个良好个开端，但是，伊搭伊还是吵相骂了，为了一眼眼事后已经想勿起来个小事体。随牢仔唇枪舌剑，争吵升级，伊呒没心思再吵下去，拿起拎包，选择逃避。

外头天气勿错，阳光也好，但是伊个心情勿好，多少有眼眼辜负大好时光个遗憾。好在有咖啡馆可以蹲蹲，还有一份资料要做，索性就投入工作伐。

走进咖啡馆，老意外个，新年个头一天，居然有介许多人勒孵咖啡馆，眼睛看了一圈，呒没忒多个选择，只有一只空位子，伊就走过去坐下来了。隔壁座位是三口之家，一对年轻夫妻带仔一个七八岁样子个男小囡。

刚刚坐下来，电脑开仔一歇歇，就听到隔壁座位个女个发出像煞歇斯底里个声音：“侬当是我勿晓得啊，侬勒算计我，侬一直侪勒算计我呀！”男个讲：“我哪能算计侬啦？凭良心……”女个打断伊，讲“凭啥良心？侬讲呀，侬讲呀。”女个越讲越生气，拿起台子上个书想去扇男个。男个呢，歪仔头挡了勒海：“有闲话好好叫讲嘛，何必动手呢？”

女个，有只苦大仇深个面孔，哭出乌拉个眼睛五海六肿，男个倒是有几分潇洒搭仔油滑，贼搨嘻嘻个。突然一看，觉着埃个女个老嚣张个，只看到伊特别刺耳朵个闲话，行为搭仔老衰瘏个面孔，大概是受了勿少委屈。男小囡勒看三四，大眼睛眨发眨发，，一歇歇看看爸爸，一歇歇看看姆妈，有点勿晓得哪能办。奇怪个是，伊拉搿能大吵大闹，旁边个人好像呒没受到影响，甚至连眼皮也勿抬一下。咖啡馆里有种奇特个音质效果，可以拿一切世俗个噪声打好马赛克。

勿晓得哪能，看到隔壁头勒争吵，伊竟然有种平静，看来，今朝勿开心个勿止伊一家头，吵相骂个家庭也勿止伊拉一家。关于婚姻，村上春树有感悟名言：“讲得残酷一些，婚姻生活就是近乎冷酷个相互磨合过程”。伊只是搭所有个夫妻一样，勒“磨合”期当中。张开眼睛看过去，介大个咖啡厅竟然呒没空位子，于是，心里暗暗叫想，新年刚刚开始，跑来孵咖啡馆个人大多是勒屋里向无聊个人：要么是单身个，要么像伊跟隔壁座位个一样是来生气个。

隔壁座位个争执断断续续，伊也慢慢叫进入了工作状态。勿晓得过了多少辰光，伊再抬起头个辰光，发现隔壁座位已经老安静了，男个一面吃咖啡，一面勒指导儿子做功课，而女个拿头斜靠勒男个肩胛浪，闭目养神。假使勒搿辰光有人进来，看到搿个温馨个场面，一定勿会想到，之前搿搭还刚刚上演了一出河东狮吼。

手机铃声响了，伊瞄了一眼，是伊个先生打过来个，伸手想拿起来借，心里又“搭架子”，还是摆下来了。一歇歇，手机又响起来了，搿趟伊个气也基本呒没了，先生问伊啥辰光回来，伊讲再过一歇就回来了，又马上问，要带一点熟菜回来伐？搭隔壁座位浪个一样，伊看上去好像啥事体侪呒没发生过。