下载客户端

上海嗲女人

2024-08-28 13:59

来源：澎湃新闻·澎湃号·湃客

来源：新民晚报

作者：章慧敏

沪语改写：丁一军

诵读：李群

文字、语音审核：丁迪蒙

编辑：王乙其

适意个下半天，几个朋友到一家老派咖啡馆去享受下午茶。一句“嗲女人”个招呼声进入了我个耳朵，交关辰光呒没听到个名字，有点面熟陌生。

拨称作“嗲女人”个，是阿拉当中个一个，人缘邪气好。要问啥道理？大概是伊个“嗲”跟阿拉产生了共情伐。勿夸张个讲，伊个搿些勿刻意、勿肉麻个表扬人个办法让人邪气适意，讲啥人家屋里向整洁、讲啥人个菜烧得好吃、讲啥人个衣裳着得看上去适意个辰光，伊侪会得带一句“老嗲个”。“嗲”是上海闲话，“嗲女人”也就成为了上海滩浪个一只特色。只要女个嗲得适意，自然会得拨人欢喜。我真个觉着搭嗲女人来往，脾气再火爆个人也勿一定凶得起来了。

勒我个纯情年代里，阿拉行拿搿些生得雪白、清爽、文静又怕难为情个小姑娘叫做嗲妹妹。放学回到屋里向，跟弄堂个嗲妹妹白相跳橡皮筋、造房子、踢毽子咾啥。我最喜欢看嗲妹妹头浪向扎个小辫子一蹦一跳荡到半空当中，辫子浪向个乔其纱蝴蝶结让交关小姑娘眼热得勿得了。还有就是伊拉身浪向个香肥皂个味道，隐隐约约，又实实在在个散勒空气里向。伊拉斯斯文文，哪怕搭艮头艮脑个“野小鬼”讲闲话，阿末辰光也会用句邪气礼貌搭仔温和个“好勿啦”来表达诚意，小辰光就晓得尊重人家，可能搿就是我心里向嗲妹妹个样子。

等我长到可以荡马路、用钞票个年龄，特别欢喜荡个马路就是淮海路。一个是淮海路浪个西餐馆、西饼店蛮多个，奶油蛋糕、罗宋汤个奶香常常冲击我个味蕾，还有就是饱眼福，看看埃眼打扮得山清水绿个嗲女人从马路边浪个弄堂里慢慢叫介走出来，让人看得实在是适意。勒埃个物资缺少个年代里，“嗲”成为了生活当中个一味调剂品，现在辰光，再让我回味昨日子个感觉，脑子里会得勿知勿觉个跳出徐志摩个搿句“最是那一低头的温柔，像一朵水莲花不胜凉风的娇羞”。

上海女个侪有点“嗲”个能力搭仔资本，伊拉重视日常生活，经营之道就像勒勒做一番事业一样个重视。就讲埃个嗲女人伐，阿拉一直认为事业有成，夫妻相互体谅，儿子又是个“学霸”，搿个美满家庭眼热煞大家了。但是，伊讲屋里向个成与败只有一步相隔：曾经，伊看到先生压力大，儿子勿认真做作业，就想做做贤妻良母个，尽量勒饭菜浪下功夫，让伊拉吃得适意，放松心情。呒没想到辛辛苦苦做好，先生皱仔眉头勿想吃，儿子勉强到台子浪吃好完成任务。好几天搿能，伊个心血白白浪费，勿要讲有多少勿开心了。

埃些日脚为了爷两家头对伊付出个勿理解而吵相骂、冷淡伊，伊吃力煞脱了。埃天仔，先生搭伊讲，人家讲侬嗲，侬阿里嗲啦，明明是作呀……伊也勒反省：先生勿想吃大概肚皮勿饿，等伊肚皮饿了勿是照样穷吃八吃啊？儿子一时头浪个退步就认为伊没办法了，为啥勿想想伊是否吃力了？计较得忒多，产生个侪是负能量，一旦想通，情绪自然就释放了。嗲女人个一只小小个例子包罗万象，勿得勿服气伊是智慧个：既有拨人宠爱个需求，也会得拉满情绪价值影响其他人。