下载客户端

沪语悦读：龙虾片

2024-01-15 17:44

来源：澎湃新闻·澎湃号·湃客

原创林筱瑾海上梦叠

文章来源：新民晚报

作者：林筱瑾

沪语改写、诵读：丁曙立

文字、语音审核：丁迪蒙

编辑：王乙其

一身粉粉嫩个女儿装，阿拉就称作“伊”伐，虽然讲查勿到伊上头三代个族谱，但是，勒阿拉还勿晓得澳龙、波士顿龙虾是啥个物事个、啥侪要票证个年代，伊有一只意义勿详、但却是邪气挺括个名字——龙虾片。勿要小看伊，勒现在食品店个零食堆里向排勿上号，但是勒当年，要想品尝伊新出炉个味道还真个是要排脱一歇队个。

伊个辰光，秋风当中个长春食品商店，墙浪向个鼓风机呼拉拉个响，一片片深红颜色个半透明个龙虾片拨摆到油镬里去氽，一记头开出一朵朵姿态万千个“烟花”，师傅用笊篱拿伊撩起来，也撩出了一股股挡勿牢个诱惑。排勒队伍最前头个男青年第一个买到，搭女朋友卿卿我我个背影让人看了只会得咽馋唾水，我搭姆妈终于迫勿及待个捧了一袋勒手里，隔了薄薄个黄油纸，享受扑鼻个脂香余温。送一片到嘴巴里，舌头个尖尖头浪一记头传来一阵阵酥麻个感觉，味觉完全拨俘虏了，接牢仔，酥脆勒嘴巴里轻轻流转，搭牙齿对唱，由脆到融化个过程可以用“性感”两个字来概括，鲜咸个味道当中让人对虾产生了无尽个想象。当时辰光，一包两角洋钿个价钿实在是勿便宜个，但是带拨胃个记忆流光溢彩，温暖到现在。暗暗叫想，假使迭群粉色个尤物裹勒香阵穿越时空而来，足可以拿当今搿眼小资手里向个糖炒栗子个焦香比下去。

也确实是有眼尴尬个，龙虾片上勿了小吃个厅堂，又放勿下身价，而且，伊也勿属于点心一类，搭伊是旁门亲眷个膨化食品爆炒米花、爆年糕片相比，伊偏偏是宁愿玉碎、勿为瓦全个命，勿耐久藏，所以始终勒零食个边缘踏勒勿变个步伐。