- +1
夏日念鲞
原创 吴翼民 海上梦叠
来源:新民晚报
作者:吴翼民
沪语改写:周红缨
讲述:施陈骅
文字、语音审核:丁迪蒙
编辑:王乙其
假使问天热辰光勒食物方面最想吃点啥?我毫勿犹豫个回答:“夏日念鲞。”
最近日脚,凡是到菜场里去买菜,侪会得朝水产圈子跑跑,拉长了鼻头闻闻夏天个鱼腥味,因为迭个季节有得三种优质鱼鲜闪亮登场。
![](https://imagepphcloud.thepaper.cn/pph/image/262/82/722.jpg)
阿里三种鱼鲜呢?河、湖里个白鱼、长江个鲥鱼、东海个鲞鱼。搿三种鱼侪是天热辰光个鱼中极品。据说搿三种鱼出自于同一个老祖宗,讲个是白鱼入江变成了鲥鱼,鲥鱼入海化作了鲞鱼。侪讲得有板有眼个,看形态呢,确实也老像个。
先讲讲河、湖里向个白鱼,迭个季节正好大量产子,拿自家养得邪气肥腴,称之为“时里白”,夏至节气就是民间所讲个“时里”,迭个时节是江南人吃白鱼个季节,于是,“时里白”成了为时令佳品。听渔民讲,白鱼产子排场邪气大,成千上万集结而行,组成“白鱼阵”,奔腾呼啸,逆流而行,勒太湖里泛起一片银白,渔民看见了敬若神明,是勿敢惊扰个。
![](https://imagepphcloud.thepaper.cn/pph/image/262/82/725.jpg)
埃个辰光个普通百姓,侪抢勒海买白鱼、吃白鱼,清蒸、红烧、糟、煎,各种做法。记得读师范个辰光,有位教务张主任最欢喜搿一口唻,三日两头拿搭了盐花个白鱼摆勒办公室个窗台浪,引得学生子馋得来眼睛发亮;从前,迭个季节也是长江极品鲥鱼上市个最佳时期,伊个辰光鲥鱼已经是鱼中王者,记得侪是开段卖个,平民百姓难得买一段蒸来吃吃、应应景,算是对得起一家老小了。现在长江鲥鱼基本浪看勿到了,富春江里向还有少量,江南百姓只好靠回忆来怀念迭款美味唻。
可以抗衡“时里白”搭仔长江鲥鱼美味个,只有鲞鱼啦,并且,勒热天介,普通百姓个吃饭台子浪最常见个就是鲞鱼,并且,是咸鲞鱼。
![](https://imagepphcloud.thepaper.cn/pph/image/262/82/729.jpg)
老底子,到了夏季,江南个南货店大量供应个就是咸鲞鱼,伊个辰光个价钿并勿贵,搭醉鲤片价钿差勿多,一个是腌制海鱼,一个是腌制湖鲜,侪是百姓屋里个度夏佳品,相比之下,咸鲞鱼更加受青睐。
我娘会得勒迭个辰光选购交关咸鲞鱼,盐水浸个便宜眼,晾干之后囥好,每日天蒸一条、半条,假使豪华一眼,再敲两只鸡蛋,加点黄酒搭仔葱姜,银白个鱼、红太阳形状个鸡蛋、碧绿个香葱、嫩黄个姜,搿道菜一登场就让所有个夏日菜肴黯然失色。搿只是眼观,一旦品尝,一股咸香鲜味马上就捉牢侬个筷子搭仔舌头,再也勿肯舍弃。
我娘还特别欢喜糜酥个咸鲞鱼,也就是稍微有眼勿大新鲜个货色,经过蒸炖之后鱼骨头散开来鱼肉酥脱,还有一点点臭味道。母亲讲,迭能个鱼最配胃口,就像伊平常辰光欢喜吃有点臭醺醺个咸鸭蛋一样。我竟然遗传了母亲个爱好,也欢喜迭些食品。
![](https://imagepphcloud.thepaper.cn/pph/image/262/82/732.jpg)
咸鲞鱼个微臭是从前夏天介个一绝。有趟搭朋友游锦溪古镇,勒勒逼仄个石板小街漫步,突然有迭个味道飘过来,我一言道破:“咸鲞鱼!”朋友勿相信,我跟仔味道寻过去,真个有人家勒蒸迭道菜呀。
遗憾个是,现成个咸鲞鱼现在是买勿到了,或许现在个年轻人勿大会得接受,拿伊视作垃圾食品,但是,我总归是一根筋个寻寻觅觅,呒没现成腌制个,就自家加工嘛。曾经连续有得几年,有舟山个渔民一大盒子一大盒子运来冰鲜个鲞鱼,勒农贸市场出售。我“如蝇逐臭”追踪而去,总归十条八条买进,杀好之后上盐,囥勒冰箱里,每日天个一条半条,也照例敲两只蛋,料酒搭仔葱姜齐备。整个夏天实在是有滋有味了呀。
勒苏州,鲞鱼个精华版是“虾子鲞鱼”,虾子搭仔鲞鱼侪是鲜得勿得了个物事,加工成“虾子鲞鱼”哪能可能勿鲜上加鲜呢?并且,迭道美食由采芝斋之类茶食糖果店经销,可见伊个身价勿低呀。
讲起迭个“鲞”,并勿是“鲞鱼”专用,凡是腌制并晾干个鱼侪拨冠以迭个“鲞”字,比方,上海人最中意个“鳗鲞”,就是剖杀、擦盐晾干个鳗鱼,一到年夜岁末,家家户户加工“鳗鲞”,里弄里挂得琳琅满目;再推而广之,腌晾个蔬菜也用了可爱个“鲞”字,比方讲“茄鲞”“豇豆鲞”,侪是美味。葛末,到了夏季,“念鲞”也就成为了广义个了。
![](https://imagepphcloud.thepaper.cn/pph/image/262/82/738.jpg)
![](https://imagepphcloud.thepaper.cn/pph/image/262/82/742.jpg)
作者:吴翼民
丁迪蒙
迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。沪语是吴方言的代表方言,是吴侬软语的典范。她既可以用来拉家常,也同样可以用来朗读各类诗歌散文。沪语完全可以书写,同粤语可以写作是一样的。本平台所有文章都是经过改写后,用沪语来演绎的,汉字书写也是正确的。
丁迪蒙所撰写的,与沪语相关的著作主要有:
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》,少年儿童出版社
《囡囡学成语》,少年儿童出版社
原标题:《夏日念鲞》
本文为澎湃号作者或机构在澎湃新闻上传并发布,仅代表该作者或机构观点,不代表澎湃新闻的观点或立场,澎湃新闻仅提供信息发布平台。申请澎湃号请用电脑访问http://renzheng.thepaper.cn。
![](/_next/static/media/pp_report.644295c3.png)
![](/_next/static/media/logo_caixun.cd299678.png)
![](/_next/static/media/logo_104x44_tianzi_white@2x.b88d1296.png)
![](/_next/static/media/logo_rebang.f9ee1ca1.png)
- 报料热线: 021-962866
- 报料邮箱: news@thepaper.cn
互联网新闻信息服务许可证:31120170006
增值电信业务经营许可证:沪B2-2017116
© 2014-2024 上海东方报业有限公司