炒米花（下）

原创 西坡 海上梦叠

来源：夜光杯

作者：西坡

沪语改写：潘庆纽

文字修正：丁迪蒙

诵读：潘慧芳

编辑：王乙其

往期回顾：问题来了，宋朝个所谓“爆米花”是哪能操作个呢？

我没查到邪气具体个操作细节。不过清朝人屈大均勒《广东新语》里向记勒海：“广州之俗，岁终以烈火爆开糯谷，名曰炮谷，以为煎堆心馅”。我总算看到一眼门道了。另外一个清朝人童岳荐勒《调鼎集·第九卷·点心部》“炒米”条，就讲得邪气清爽了：“腊月极冻时，清水淘糯米，再用温水淋过。盛竹箩内，湿布盖好。俟涨透，入砂同炒。不用砂炒，则米不空松，只可加五；与砂同炒，可得加倍。香，脆，空，松。筛去细砂，铺天井透处，以受腊气，冷定收坛，经年不坏。益脾胃，补脏腑，治一切泄痢。黄豆同”。

古人侪老聪明个，讲起来还是根据经验积累下来个，采用干炒方法处理。伊拉个炒米花可以想象“爆”得勿够大，但是到底还是“开花”了啊。

我想，全世界真正接近现在个爆炒米花样子个技术，应该是勒十八世纪之后。

古代个炒米花，伊个占卜功能是勒勒零食之上个。范成大个《上元纪吴中节物俳谐体三十二韵》中写到勒元宵节出来个交关民间游戏，里向有相当一部分属于求神算命个性质。“熬稃膈膊声”也是搿种。“炒糯谷以卜”讲个就是搿个事体。元末明初娄元礼个《田家五行》：“雨水节，烧干镬，以糯稻爆之，谓之荸罗花，占稻色”，讲得邪气清爽。明代人李诩《戒庵老人漫笔》里个《爆荸娄》诗里就讲：“东入吴门十万户，家家爆花占年华。就锅抛下黄色粟，转手翻成白玉花。红粉佳人占喜事，白头老叟问生涯。晚来妆饰诸儿女，数片梅花插鬓斜。”更加是讲了拿炒米花来求神算命个意思。

至于哪能介个爆炒米花会得让伊拉心愿实现，我想大概率是“炒米花”个“花”开得越多、越大就越好喽。

爆炒米花老底子是困难时期大都市儿童个快乐节目，勒其他地方则是受到相当个限制个。就算勒大都市，拿去爆炒米花个大米，勒数量浪是约定俗成个，一小罐头，相当于家庭主妇脱烧顿饭个米计量差勿多。由此产生个加工费，就算只要几分洋钿，也勿是随便啥人侪拿得出来个。

“砰”，炒米花喷进一只好像是从来勿汏个、黑黜黜个麻袋，然后，再拨倒进客户带来个盛个物事，一般性是大号个“钢钟镬子”。伊个辰光塑料袋还老老少个！囥炒米花最好个物事是空个麦乳精罐头或者是祖传个锡罐头。

其实，假痴假呆个囥，意义真个勿大。要勿了两日天，摆得拍拍潽个麦乳精罐头，就像一拉塞头，浴缸里个水就马上哗啦啦个流光了。

大人担心个还勿是吃炒米花辰光邪气可怕个铅中毒，而是糖精片带来个对身体多种脏器个损害，脱现在刚好相反。

我看到过只视频，一位能干个手工师傅，做了只微型个爆炒米花机，只有几厘米大小，一趟只好爆几粒米，照样是像模像样个。我想，伊一定是伊个时代炒米花个铁粉伐？

前一枪，有个外国人买了部爆炒米花机器，想“自力更生，丰衣足食”。结果邪气失败：要么没爆开，要么发黑发焦，要么黏勒一道，要么淡刮刮个……伊讲搿部机器勿灵。结果中国网民晓得了，侪来质问伊：侬阿是米摆了忒多了？侬看了高头个码表了伐？侬配风箱了伐？侬阿是一只手转摇炉，一只手拉风箱个？侬糖精片摆了伐？

看看看，有得介许多群众基础，炒米花要想退出历史舞台，难啊！

作者：西坡

诵读：潘慧芳

——————————————————

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年儿童出版社

《实用沪语》复旦大学出版社

《上海话绕口令》少年儿童出版社

《上海方言词语使用手册》上海教育出版社

《上海话读成语故事》少年儿童出版社

《囡囡学童谣》，少年儿童出版社

《囡囡学成语》，少年儿童出版社

原标题：《炒米花（下）》

阅读原文