下载客户端

沪语悦读：糖藕（下）

2022-07-28 14:52

来源：澎湃新闻·澎湃号·湃客

原创西坡海上梦叠

来源：夜光杯

原创：西坡

改写：郭莉

讲述：赵群社

审阅、推荐：丁迪蒙

编辑：王乙其

往期回顾：

金庸《书剑恩仇录》第八回里有只情节：红花会总舵主陈家洛，伊小辰光个丫鬟晴画，喜孜孜捧了碗桂花银耳百合汤搭仔一碟四片糯米嵌糖藕，摆勒主人面前。陈家洛拿糖藕洞眼里个糯米球一粒粒用筷子顶出来，自家吃一粒，再朝晴画嘴巴里塞一粒。迭个做派，对于小辰光同样调皮个读者来讲，应该是“会心一笑”个伐。不过湖北可能是个例外。闻一多引《红楼梦》个诗句来夸自家个家乡，湖北黄冈浠水县巴河镇，伊面出产一种多孔优质莲藕，诗句是：“心较比干多一窍，貌若西子胜三分。”据说伊面莲藕有得九孔，而一般个有七八孔就算是“天花板”了。但是“孔”再多又有啥用？闻一多个乡亲做糖藕了伐？再讲，用八孔九孔甚至更加多个孔个莲藕来做糖藕，倒也未必是顶好个糖藕。侬想呀：孔多了，意味莲藕表面积缩水，做出来个糖藕板定是米多藕少。我真个要问问伊眼欢喜孔多个朋友：侬到底是来吃藕个，还是来吃饭个？

唉！李笠翁讲过：莲荷搿恁可爱，用伊好做交关事体啊！但是伊老人家偏生又勿去做糖藕，所以只好叹息：大概是我勿会弄伊，所以只好马马虎虎亏待了迭个好物事了。

好吃个糖藕，莲藕搭仔糯米必须上乘，莲藕要粉、嫩、肥、白；糯米要糯、凝、亮、饱，迭个是糖藕个品质保证。当然，粉、嫩、肥、白也好，糯、凝、亮、饱也好，绝对勿好成为软不拉沓、萎靡不振个糖藕个借口。糖藕必须吃口Q弹，加上足够个桂花搭仔蜂蜜，迭个再是大家对一片过得去个糖藕个基本要求。

有常时，面对一盘小芥芥、薄淌淌、瘦精精、黄渣渣个糖藕，视觉效果推板得活像面对一棵营养不良个植物，或者一只呒没发育好个动物，立时三刻让人食欲大减；更加过分个，是糖藕里向糯米简直像潽出来个粥，原来轻轻爽爽个藕眼，拨伊搨得幽缈朦胧，赛过厨房间水斗个漏网拨塞牢了一样，胃口一点也吊勿起来了。要是不幸还勒吃个辰光嚼出藕片个一丝一丝个粗纤维，搿今朝真是霉头触煞脱了。

由于众所周知个缘故，我老里八早就勿再眼热小菜场门口摆个糖藕小摊头了。但是，讲起来简直是不可思议个——呒没阿里只正规店家做出来个糖藕，会得比伊拉做得更加可口好吃。有趟，我熬勿牢拿自家个迭个感受，搭一位朋友交流了一下，内心倒是真个希望伊对我报以鄙视个目光，葛末，好来洗涤冲击我迭份贪吃个灵魂。啥人晓得，朋友听了哈哈大笑：啊呀，我一直勿好意思跟人家坦白自家个低俗，想勿到啊，阿拉原来是“一票里货色”呀，缘分！