下载客户端

沪语悦读：箍桶店“小开”

2022-06-13 14:44

来源：澎湃新闻·澎湃号·湃客

原创侯宝良上海老底子

上海老底子每天呈送精彩文章一组

打开尘封的记忆，寻觅往昔的岁月

叙上海老底子事忆上海老底子人

诉上海老底子情

箍桶店“小开”

作者：侯宝良

沪语诵读：和沁

老早箍桶店生意蛮好，现在后生家勿晓得啥叫“箍桶”。今朝我顺便讲讲箍桶店“小开”的故事。侬听听就晓得箍桶个事体。

（吴理人画）

老底子日常人家侪离勿开“桶”，蒸粢饭个叫“饭桶”，大、小便用个叫“马桶”，汏脚、汏浴个叫脚桶、浴桶。搿眼桶侪是箍桶匠用一块块木板圈起来，再用铁圈箍牢，迭种店家就叫“箍桶店”。

上海人称“小开”侪晓得是老板个倪子，我讲起迭家箍桶店小开，原本勿是老板倪子，是来箍桶店里“学生意”（学徒）个小年青。伊正好姓“凯”。大字勿识几个，做事体蛮“巴结”（勤劳）人家问伊姓啥？伊就来劲讲：“袁世凯个‘凯’”。要问袁世凯个哪能事体？伊倒讲勿清爽唻。搿就覅管伊了，反正邻舍道里、上门顾客随口叫伊“小凯”，刚巧跟“小开”同音，勿晓得个人还以为是老板个倪子唻。嗳，侬覅讲巧事体是有个！辰光长了老板看看小凯做事体认真、人又老实，也想寻个将来照顾店面个人。自家有个独养囡，有趟伊问小凯是否愿意做“招女婿”？小凯是浦东人，想想爷娘过世早，老板对我勿错，当然同意为伊拉养老送终。就迭能么伊正式做了“小开”。

（范生福画）

从此，箍桶店生意就有小开管，好辣伊人客气、手艺勿错，生意自然蛮好。记得小辰光我经常到伊店里白相，叫伊小开爷叔，看伊做各种各样木桶，听伊讲做桶个木板侪是杉木，因为杉木吸水好、勿容易开裂、变形，木质松容易加工。其实箍桶个技术邪气复杂，辣规定个圆周里计算用几块木板、勿同形状个桶有勿同个扇形忒仔圆弧形以及梯形，侪靠刨、削、镂搿排手工做个。尤其是漂亮个马桶盖浪有精美雕刻工艺，拨油漆师傅上漆、描金后简直勿亚于收藏个工艺品。

箍桶店除了做常规脚桶、马桶外，更加多是定做勿同规格浴桶，像椭圆形个腰子桶、人好泡辣里厢个日本桶、茶壶保暖个茶壶桶、小菜场里腌咸菜用个水桶真是五花八门。结婚陪嫁用三件套桶，（小个汏脚、中个汏衣裳、大个汏浴）誉为传宗接代出嫁马桶讨口彩叫“子孙桶”，做功还要考究。除脱做桶外还要修理杂七杂八个旧桶，有调木板、调换断箍、拎攀咾啥个。小凯生意忙了来勿及做。

后来有了塑料马桶、水桶、洗衣机、保暖桶搿排方便、轻巧家用物事走进了千家万户，小凯迭种古老个箍桶店开始冷落了，勿晓得啥辰光无声无息关脱了。

近几年里，我辣近郊古镇好奇个看到有爿箍桶店，陈列出各种小马桶、脚桶、茶桶模型。小老板伊讲现在主要做时尚个泡脚桶，搿排模型侪是伊拉阿爸做做白相，新婚人家特别欢喜“子孙桶”。正辣讲话辰光，里厢出来一位老人，看我有眼面熟陌生想勿起来，我看看倒想着了：“侬是，箍桶店小凯！”倪子奇怪问爷：“阿爸侬认得伊啊”？老人家激动讲“哪能勿认得？是阿拉老早老邻居啊”！

根据2022年6月12日《新民晚报》上海闲话改编

（配图来源：网络）

作者简介：

侯宝良，中国散文学会会员、上海市作家协会会员,经济师职称。散文、随笔、故事作品散见于上海及各地的报刊、杂志和电台。在《新民晚报》各版面已刊载了一百多篇的文章，汇集出版了《我和飞燕有个约》，先后出版了散文集《弹街路》《弹街路续集》《申情难忘》，评论集《孰是孰非》。多年来参与国内各类征文，其中《德娥》、《莲芸祈福》荣获第十六届、十八届中国月饼文化节征文的“一等奖”；《凝固的记忆》、《世博人家》、《三气定忠魂》《上海书展为我写好“上海闲话”》等先后获得上海移动十周年征文、上海“世博会”征文、上海第十七届读书节征文以及上海书展十周年征文的“二等奖”，还获得上海十六届国际艺术节、2017年第二十届上海国际电影节等的“最佳作品”奖、《做生活的强者》获2018年上海市民文化节改革开放四十年阅读中真善美征文的“十佳作品”。