- +1
寒食有感
原创 沈嘉禄 海上梦叠
作者:沈嘉禄
沪语改写:边秦翌
沪语讲述:牛美华
推荐:丁迪蒙
编辑:王乙其
勒古代,清明是寒食个下半场,寒食之后一天或者三天再是清明。寒食伊日天有得一场邪气好白相个活动等勒海,对个,搿就是内宴冷食。
![](https://imagepphcloud.thepaper.cn/pph/image/126/193/787.jpg)
唐代诗人张籍有首诗,叫做《寒食内宴》:“朝光瑞气满宫楼,彩纛鱼龙四周稠。廊下御厨分冷食,殿前香骑逐飞球。千官尽醉犹教坐,百戏皆呈未放休。共喜拜恩侵夜出,金吾不敢问行由。”
葛末,到底啥个是内宴冷食呢?就是勒宫廷里向举办个冷餐会呀。假使能够分享到一块奶酪,迭个官员就会觉着邪气光荣,还要搭其他官员一道同喜拜恩,撸撸胡子,唱二两句诗,让大家侪好晓得晓得。
![](https://imagepphcloud.thepaper.cn/pph/image/126/193/802.jpg)
皇宫里向个冷餐会肯定是豪华版咾,《太平御览》迭本书里就讲到,勿单单有“干粥、醴酪、冬凌粥、子推饼、馓子”,还有“香骑逐飞球”个马球比赛搭“百戏皆呈”个文艺表演,各式各样个节目侪有个;大臣拉虽然大清老早天还呒没亮就要出门了,但是想想有得吃,还有得白相,当然是一生当中最最难忘个经历了,最后是“吾皇万岁、万岁、万万岁!”
又有得问题了,子推饼又是啥个物事呢?原来啊,是一种面食,是为了纪念介子推个,到底是伊啥个形状,啥个味道,我侪勿晓得,必过倒是邪气想吃吃看个。《东京梦华录》里向提到“用面造枣糊飞燕,柳条串之,插于门楣,谓之‘子推燕’。……四野如市,往往就芳树之下,或园囿之间,遍满园亭,抵暮而归。各携枣糊、炊饼,黄胖,掉刀,名花异果,山亭戏具,鸭卵鸡刍,谓之‘门外土’。”此地讲个枣糊飞燕、就是用面粉做成功燕子样子个饼,高头嵌几粒红枣,搿是专门为了寒食而特制个,可能搭子推饼是一桩事体。黄胖、掉刀末,侪是拨小朋友白相个玩具。
子推饼,或者枣糊飞燕侪失传了,当然咾,介子推只有一个,是勿好复制个。
![](https://imagepphcloud.thepaper.cn/pph/image/126/193/812.jpg)
关于寒食节,大家一定记得一首诗,伊实在是忒有名了:“春城无处不飞花,寒食东风御柳斜。日暮汉宫传蜡烛,轻烟散入五侯家。”
搿首诗是韩翃写个。交关专家,包括教科书浪侪讲韩翃写个是首讽刺诗,表面浪看,伊描绘了一幅风俗画,画个是寒食节、长安城。实际浪,透过搿几句闲话,可以觉着作者有得强烈个勿满,对当时辰光权势显赫、作威作福个宦官进行了深刻个讽刺。中唐以后,几任昏君侪宠幸宦官,以致伊拉个权势邪气大,败坏朝政,排斥朝官,正直人士对此侪是邪气愤慨个。据讲,迭首诗就是因此而发个。
搿是真个啊?假使讲韩先生居然敢讽刺皇帝搭宦官集团,唐德宗还能够勒中书省送上来个干部推荐名单当中、特批迭个韩翃上位、担任知制诰迭个职位伐?勿大可能个伐。知制诰,相当于搿歇个中办秘书,级别是老老高个唻。所以,我认为韩翃根本呒没讽刺宦官集团,而是勒“正面歌颂”,伊踏准仔节拍,表达了对皇权个崇拜,美化了唐代个封建统治结构,对皇帝以分送明火来传递某种政治信息个方式,拨勒大家一种诗意个解读。葛末,迭个信息个实质到底是啥个呢?就是要求群臣搭民众侪要像介子推一样,对皇权绝对个忠诚。
![](https://imagepphcloud.thepaper.cn/pph/image/126/193/814.jpg)
介子推作为中国个政治资源搭文化资源,至少从唐代之后就一直拨浅层填埋脱了。
必过我再补充一点,介子推个价值有得两个方面,一个是忠君,而且是打了提前量个忠诚,侬讲伊是勒勒押宝,我也勿反对,勒古代,文人搭王子粘勒一道本身就是一种冒险。两是淡泊名利,功成身退,有辰光也会得变成功勿好好叫合作个样子。统治者看重个是介子推个前传,失意文人反倒是从绵山隐匿当中寄托自家个情怀,自我安慰。严子陵个故事也是差勿多个。
再回到寒食节。勒勒古代,搿是只群众性个民俗活动,还包括扫墓祭祖、禁烟、寒食、种树、插柳、踏青、秋千、蹴鞠、赏花、斗鸡、馈宴、咏诗咾啥,内容蛮丰富个,有环保,有娱乐,有体育,有宴饮,有诗歌朗诵,要持续好几天唻。随牢仔辰光个流逝,有眼项目就融入到清明节去了;到了搿歇,剩下来个只有扫墓搭仔青团了。
![](https://imagepphcloud.thepaper.cn/pph/image/126/193/815.jpg)
搿歇讲起来,内宴寒食讲勿定是中国最早个顶级冷餐会了。今朝阿拉个日脚越来越好,其实也可以趁牢仔踏青扫墓个机会来一趟野餐,勒河浜旁边寻只绿草茵茵个坡地,塑料布一铺,有条件个闲话末最好支一顶野营个帐篷,摆开啤酒、香肠、午餐肉、黄瓜、香蕉、草莓咾啥,带只烧烤架子,小朋友肯定是老起劲个。搭仔河浜旁边萍水相逢个其他小朋友一道白相相,相互之间交换面包、蛋糕,风月同天,侬讲哪能?
假使讲,搿天仔阿拉勒野餐之后还有得余兴,葛末就可以去看看桃花,再采眼桃花回转去浸酒。《法天生意》里向讲到:“三月三号,采桃花浸酒饮之,除百病,益颜色。”秀发及腰个美女拉,穿好仔披襟带风个汉服,脚浪向着绣花鞋,手里向拿仔把团扇,俯身拾花,回眸一笑,拍成功小视频传到朋友圈去,哦呦喂,一记头就霸屏唻!
![](https://imagepphcloud.thepaper.cn/pph/image/126/193/816.jpg)
最后,搭大家一道复习复习苏东坡先生个《望江南·超然台作》:
春未老,风细柳斜斜。试上超然台上望,半壕春水一城花。烟雨暗千家。寒食后,酒醒却咨嗟。休对故人思故国,且将新火试新茶。诗酒趁年华。
苏先生个搿首词比“春城无处不飞花”更加有名,因为有句“诗酒趁年华”,阿拉好像就有了可以穷吃八吃、放纵放纵自家个理由。其实,我更加中意个是“休对故人思故国,且将新火试新茶”搿两句。迭个再是诗眼,是最让诗人戳心境个地方,是中国文人个价值观。
![](https://imagepphcloud.thepaper.cn/pph/image/126/193/819.jpg)
—————————————————————————————
![](https://imagepphcloud.thepaper.cn/pph/image/126/193/820.jpg)
作者:沈嘉禄
![](https://imagepphcloud.thepaper.cn/pph/image/126/193/822.jpg)
讲述者:牛美华
——————————————————————————————
丁迪蒙
迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。
沪语是吴方言的代表方言,是吴侬软语的典范。她既可以用来拉家常,也同样可以用来朗读各类诗歌散文。
沪语完全可以书写,同粤语可以写作是一样的。本平台所有文章都是经过改写后,用沪语来演绎的,汉字书写也是正确的。
丁迪蒙所撰写的,与沪语相关的著作主要有:
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》,少儿出版社。
![](https://imagepphcloud.thepaper.cn/pph/image/126/193/823.jpg)
————————————————————————————
欢迎大家关注丁老师的另一沪语平台:启迪心田沪语
原标题:《寒食有感》
本文为澎湃号作者或机构在澎湃新闻上传并发布,仅代表该作者或机构观点,不代表澎湃新闻的观点或立场,澎湃新闻仅提供信息发布平台。申请澎湃号请用电脑访问http://renzheng.thepaper.cn。
![](/_next/static/media/pp_report.644295c3.png)
![](/_next/static/media/logo_caixun.cd299678.png)
![](/_next/static/media/logo_104x44_tianzi_white@2x.b88d1296.png)
![](/_next/static/media/logo_rebang.f9ee1ca1.png)
- 报料热线: 021-962866
- 报料邮箱: news@thepaper.cn
互联网新闻信息服务许可证:31120170006
增值电信业务经营许可证:沪B2-2017116
© 2014-2024 上海东方报业有限公司