下载客户端

沪语悦读：上海的棋盘街在哪里？

2021-03-18 17:44

来源：澎湃新闻·澎湃号·湃客

上海老底子每天呈送精彩文章一组

打开尘封的记忆，寻觅往昔的岁月

叙上海老底子事忆上海老底子人

诉上海老底子情

上海的棋盘街

在哪里？

原创：薛理勇

来源：魔都白领群2021.3.1

上海话改写：郭莉

讲述：郭健

中学辰光，我读了一本叫做《孽海花》个“谴责小说”，里向讲：新科状元金雯青做了驻德国公使，带了苏州名妓赛金花，也就是傅彩云，勒苏州乘船，沿苏州河到了上海，勒勒“大王庙官码头”上岸，就直接坐马车到“棋盘街”去买了交关绫罗绸缎，准备添置出国服装。

▲ 仪和老栈店招，位于棋盘街四马路（今福州路）

“大王庙”我晓得个，以前阿拉弄堂口有只皮匠摊，老皮匠儿子小皮匠是我小学同学。“大王庙”有庙，勒勒现在成都北路苏州河边，当年成都北路新闸路一带形成一只“皮革市场”，我经常陪小皮匠到伊面去买眼零星碎皮料。

▲ 大王庙官码头，图片来自《图画日报》

但是，“棋盘街”我并勿晓得。迭个“棋盘街”名字已经呒没了。

▲ 1884年地图上的“棋盘街”

其实，棋盘街勒勒近代上海，是邪气有知名度个，甚至勿亚于南京路，上海历史文献、各种著作、小说里向，棋盘街也常庄出现，估计是到了20世纪50年代开始没落。不过，还是留下了“东棋盘街”搭仔“西棋盘街”两条小路，知名度也并勿高。

▲ 河南路（棋盘街）福州路南望，右首为中华书局，1932年2月15日

▲ 位于棋盘街的中华书局

近代以后，上海县城北面出现了租界，租界建设是先规划，后开工，所以，租界里马路横是横、直是直，纵横有序、井字排列，像中国棋盘，乃末就叫做“棋盘街”，后来，租界每一条马路侪有了名字，“棋盘街”所指个区域缩小了。《同治上海县志》讲：“棋盘街。有东西两处，侪勒勒紫来街北面”，又讲：“紫来街。北门外东”。紫来街就是现在个紫金路，所谓“东西两处”个“棋盘街”，就是后来个东棋盘街搭仔西棋盘街。

▲ 图左为《同治上海县志》对“棋盘街”的解释，右图为《光绪上海县续志》对“棋盘街”的解释

《光绪上海县续志》讲：“棋盘街。江西路西，山东路东，广东路南，纵横皆称‘棋盘街’，在河南路东者叫‘东棋盘街’，西者，叫‘西棋盘街’。”勒勒江西路西面，山东路东面，广东路南面，侪叫做“棋盘街”，在河南路东面个叫做“东棋盘街”，西面个叫做“西棋盘街”。经过历年城市建设，一眼小路侪呒没了，勒勒江西路、山东路之间只剩了河南路，理所当然，搿条河南路就是“棋盘街”或者“老棋盘街”，留下来个河南路两边就叫做“东棋盘街”跟“西棋盘街”。

问题是《光绪上海县续志》并呒没说明“棋盘街”北端到啥地方。

▲ 不同时期《上海指南》关于河南路的记载

1909年版《上海指南》讲：“棋盘街，英租界，即河南路南首，南京路到三茅阁桥北。”也就是讲，棋盘街是指南京路到三茅阁桥，如今延安东路河南中路口之间个河南路；而民国以后个《上海指南》讲个是：“棋盘街就是河南路南段，福州路南，爱多亚路，就是三茅阁桥北”，迭个是讲棋盘街是指福州路到爱多亚路之间个一段河南路。

原来，南京路河南路交叉路口一带俗称“抛球场”，“抛球场”名气越来越大，使得“抛球场”地名实际所指范围勿断扩大，占据了原来“棋盘街”个区域，结果“棋盘街”所指个区域就勿断缩小。所以，跟交关历史地名一样，必须根据勿同年代来识别勿同区域。到现在，“棋盘街”地名只是一只曾经存在过个历史地名而已。

▲ 1918年地图，河南路的南段俗称“棋盘街”

近代上海开埠以后，丝绸搭仔茶叶是中国主要出口商品，洋布，也就是棉布呢，又是进口商品个老大，所以勿少专营丝绸或者洋布个商行，侪勒勒河南路棋盘街出现。

▲ 萃隆衣庄（1898-1914）位于棋盘街广东路交叉口，右首为同芳茶居在河南路棋盘街54号，清末

▲ 萃隆绸缎衣庄位于棋盘街广东路交叉口，右首为同芳茶居在河南路棋盘街54号

▲1914年11月，萃隆衣庄已经变更为萃昌祥洋货号，同芳茶居仍在

1860年，福建人祝氏兄弟开设了“介福丝绸庄”，伊拉就勒勒棋盘街三马路，就是现在汉口路，后来搬到了棋盘街九江路口，一直到1936年秋天，搬到南京路河南路口现在个地方。一般大家侪以为，“介福”，就是两个福建人个意思，后来搿爿店拨人家盘脱，改名“老介福”。实际浪，从前商铺习惯使用四书五经里向个词语作为自家店铺名称，《诗经·大雅·既醉》有搿恁个句子：“既醉以酒，既饱以德。君子万年，介尔景福”，“介尔景福”就是“赐拨侬大福气”个意思。所以，老个店招牌，今朝我伲千万勿好“望文生义”，结果去拿一只邪气雅致个招牌，白白里污糟脱了。

▲ 搬至南京路的老介福，1935年

根据1910年勿完全资料统计，当时上海由中国人开设个、规模比较大个主营进出口、兼营零售批发个绸缎庄，大约10家左右，其中9家侪勒勒河南路棋盘街浪，老介福、老九章、老九和、大纶、裕纶、嘉纶、天成唠啥，侪勒勒此地。另外，浙江丝绸商勒勒此地开设个经营杭州丝绸批发个丝庄搭仔主营零售个丝绸店，更是不计其数，棋盘街也就成了上海丝绸业最集中个丝绸街，闻名全国。

▲ 清末河南路泗泾路口，永生利铜铁器油漆号和安吉衣庄开设在河南路棋盘街68号和66号

▲ 1927年4月18日呢绒业调查表，其中位于棋盘街的华成呢绒号由曹宗华（曹光彪之父曹厚敦，字宗华）创办

▲ 鸿祥呢绒号、同新呢绒公司由曹光彪创办，图为1948年12月23日刊登在《申报》上的广告

棋盘街是租界搭仔上海县城个主要通道，商号林立，人流密集，城市交通因此带来蛮大问题。1921年，公共租界勒勒营建新个工部局建筑辰光就限定，今后河南路商店拆除重建辰光，必须让出适当面积作为道路用地，也就等于是现在大家侪晓得个“退让红线”。乃末从上世纪二十年代起，交关丝绸商店侪陆陆续续搬迁脱了，棋盘街作为特色个“丝绸服装一条街”也就衰落了。