老早撑过个油布伞

原创 钱红春 海上梦叠

来源：夜光杯

作者：钱红春

沪语改写、诵读：倪云华

指导、推荐：丁迪蒙

整理壁橱，翻出阳伞靠廿把，有长柄伞，有折叠伞，有用过个旧伞，也有连包装也呒没拆开个新伞。有自家买个，有单位发个，还有比赛个奖品。看到介许多伞，我又想起小辰光撑过个油布伞。

油布伞个伞骨是用竹头做个，像筷子一样粗。伞竿长大概有1米，笛子介粗细，连接伞骨个铰链座搭仔伞帽侪是木头做个。伞竿把手个后头有只小洞眼，穿根绳子就可以挂起来。伞面用桐油刷过好几遍，油光光，蜡蜡黄。

油布伞个份量勿轻哦，一把起码有两三斤重，撑伞走路邪气吃力。假使只是重一眼也就算了，关键是撑伞个过程更加麻烦。像现在两只手悬空开伞或者一只手就可以开个自动伞，当时想也勿要想。

油布伞新个辰光还算好，只要用伞顶牢仔墙壁，手搭腰一道用力，就可以撑开了。旧伞呢，经过风吹雨打，油布伞面缩水变硬，再被雨水浸湿之后，伞布互相吸附粘了一道，搿就要拿出吃奶个力道了，整个身体侪要扑上去，再能勉勉强强撑开。有辰光实在撑勿开，只好要末向同学讨救兵一道撑，要末就喊几声“阿姨爷叔”，请走过路过个大人帮帮忙。所以小辰光读书碰着落雨天，除非爷娘硬劲逼牢，我宁可淋湿脱也勿愿意撑伞。

油布伞用过以后，一定要撑开晾干，天晴以后再勒太阳下头暴晒，等干透再可以收起来。否则伞面勿但会相互粘结，还会发霉，变得龌里龌龊，灰不溜秋，撑开个辰光还有一股难闻个味道。

当时油布伞个大小、颜色侪差勿多，为了防止借来借去弄错脱，交关人家用油漆勒自家个油布伞浪向作记号或者写上自家个姓。至于大尺寸个油布伞，平常是看勿见个，记得小辰光勒屋里附近只看见过有只拔牙齿个摊头浪有把落地个遮阳伞，撑开来个伞面直径差勿多有4米。据说搿种油布伞侪是要定做个。

埃歇辰光虽然也有比较轻巧个钢骨伞，但价钿要比油布伞贵交关，一般人家勿舍得买。假使勒路浪看到有人撑一把钢骨伞，大家就晓得伊拉屋里肯定有钞票。

上个世纪六十年代末我进厂工作，勒领取工作证搭仔各种劳防用品个辰光，还领到了一张借伞证，落雨天呒没带伞个职工可以凭证借伞。搿眼伞侪是油布伞，每把伞浪侪用红漆写好编号搭仔厂名。厂里有专门放伞个房间，平常借伞还伞侪由门卫负责。我当时是踏脚踏车上下班，一方面是自家觉着车技勿大灵光，落雨天撑把介重个伞怕路浪出事体，据说厂里曾经有人因为撑油布伞踏脚踏车掼得勿轻；另外一方面也实在是小辰光被油布伞撑怕了，所以我从进厂到离厂个十多年里，借伞证一趟也呒没派过用场。

诵读者：倪云华

指导、推荐：丁迪蒙

原标题：《老早撑过个油布伞》

阅读原文